 |
| رواية مريم الحلقة 2 |
#مريم
الجزء الاول
رقدت و انا في قمة السعاده انقلبت الموازين يا حسام و انا واثقه انك تفكر فيا و سرحان و مش على بعضك و صايره فيك حاله
تاني يوم ما كانش عندي نيه نمشي للحفله في الصاله و اختي المتزوجه تحاول تقنع فيا و انا حاسه ان مشيتي بلا فايده
بس قلت يلا خلي نزيد نلفت نظر العيله لان اكيد بعد العرس بيقعمزوا و يهدرزوا قدامه على اهل صاحبه
نضت دوشت و لفيت شعري و طلعت قفطاني الاحمر و شوز ذهبي و درت ماسك لي وجهي جتني امي قتلي معاش نعرفك شن الي يغيرك هكي ؟ قتلها عادي انا ماشيه لعرس كيف تبيني نمشي ؟
قعمزت شديت تليفوني و فتحت الانبوكس لقيته باعتلي الساعه 5 الصبح كاتبلي مريم
تحتها ❤️
و باعتلي الصبح صباحك ورد 🌹
ضحكت و فرحت فرحه ما عمري حسيت بيها و عرفت وقتها ان كل شي يجي بالساهل يمشي بالساهل و ح نطيبك على نار هاديه و انا مش مستعجله على شي لاني مش مستعده نكون مجرد بنت في حياتك و خلاص و لازم نغير فكرته عليا لاني انا الي بعتله اضافه و لفتت نظره
لبست و مكيجت و حاولت نبرز لون عيوني و فتحت شعري و كنت راضيه على نفسي كل الرضى
مشينا للصاله و نحيت عبايتي و خشيت كانوا العيون عليا كالعاده و كان غروري بيتفجر مني و ابتسامتي ابتسامة الواثقه من نفسها سلمت و قعمزت انا و امي و كنت عارفه ان مش ح نقدر نشوفه
كانت حفله حلوه و تكاليف واضحه انها باهظه و احنا طالعين مروحين ركبت السياره مع احمد و من الزحمه ما قدرتش نشوف حسام وين و مشينا بالسياره و فجأه قبل ما نطلعوا من باب الخارجي وقف احمد على حسام و كان قلبي مش بين ضلوعي
نزل من سيارته Bmw لبسته كاجول ساعته خاتمه عطره ضحكته عيونه لحيته
كلهم دمار شن درت فيا حسام
غمضت عيوني و كأني نقول لي قلبي اهدأ أهدأ حتى هو قلبه هكي
مشينا بالسياره و طول الطريق و انا نفكر اني بنرد عليه في الانبوكس لان معاش قادره خلاص
قعد احمد يحكي على حسام و كيف كل شي على راسه و حياته بين الاردن و ليبيا و ايطاليا و خدمته و انه ولد حشومي هلبا و مش متع دوه فاضيه و يشكر فيه و يعاود
زاد الاعجاب زاد الحنين زاد الشوق زادت اللهفة
روحنا حوشنا و خشيت فراشي و فتحت الانبوكس لقيته باعتلي كاتبلي احلى ورده 🌹
فرحت كالعاده شعور الانتصار حلو و انك كسبتي شي كنتي متلهفة عليه
ما فتحتش الرساله كالعاده بس كان عندي احساس انه يعرف اني نشوف في رسايله لانه كان يبعتلي من غير ما يطلعله ان شفتهم
بدت حياتي حلوه بديت نحس بروحي بكياني بجمالي بأنوثتي برقتي بدلعي بدلالي بكل شي فيا
قعد كل مره يبعتلي ♥️🌹 و انا نشوف و نطنش و في يوم بعتلي ع الفيس رديلي خاتمي هي نبيه انا توا
ضحكت و رديت عليه قتله تعالي خوده قالي نجي ناخدك انتي
قررت اني نسيطر على روحي و نتقل عليه و نخليه يستنى امته نرد عليه و نكلمه
بدا كلامنا محصور في صباح الورد و كيف حالك و بس
و في يوم ما رديتش عليه و صكرت النت لي تاني يوم فتحته لقيته باعتلي رقمه و قالي كلميني مشغول عليك
فرحت
خفت
ارتبكت
كيف نتصل ؟
كيف نكلمه ؟
كيف نسمع صوته ؟
لا لا ما نقدرش
ح ندوخ
شن اندير
كتبتله ان انا نتحشم نتصل بيه
قالي ابعتيلي رساله
صكرت و قعدت نفكر ان انا ما نبيش كل شي يصير بسرعه
نبيه يستنى
نبي نبعتله رساله في وقت هو مش متوقعه بعد ما يأس من الانتضار
قعدت يومين ع الحال هذا
و بعدها في الليل خشيت فراشي و بعتله 🌹
بعتلي ❤️
دقائق و اتصل بيا
ما رديتش عليه نضت قعمزت و شاده تليفوني نقوله لا ارجوك ما تتصلش ما عنديش القوه نرد عليك
بعتلي رساله ردي يا عسلي
زادت الرساله خششتني الانعاش ااااه يا ربي اعطيني القوه
عاود اتصل بيا و رديت و قعدت ساكته
قالي الو
انا صوت انفاسي تعادل صوت الريح
ردي يا احلى ورده
رديت هلا
قالي متحشمه ؟ قتله و خيرني ما نتحشمش 😌؟
ضحك ضحكه كانت كفيله اني نحذف تليفوني من ايدي من كثر التوتر
مريم ما تضعفيش ما تبينيش انه قدر يدير فيك كل هذا
نسمع فيه يقول الو. الو
خديت الجهاز و قلت نعم
قالي محلاه المتحشم
قالي ما نبيش نوترك اكثر من هكي لكن انا مش ح ندير شي غلط من وراء صاحبي
قتله شن قصدك ؟
قالي الي نرضاه لي روحي نرضاه لي خوك و انا راجل ما نستغفل حد و ما نضحك على حد
قتله الي نفهمه ؟
قالي في حد في حياتك ؟ قتله مش مجبوره نرد .. قالي لو في حد في حياتك اعتبري المكالمه هادي ما صارتش و لو في حاجة ليا انا انا مستعد نكلم خوك
رديت عليه هكي على طول ؟
قالي العيله و نعرفها و خوك من نعم الناس و انتي في القلب و امي و اخواتي يشكروا فيكم
فكري يا احلى شي صار في حياتي و ردي عليا و توا نخليك ترتاحي
صكر الخط
حسيت كأن روحي في الجنه ترفرف
هذا نعيم الجنه يالله
كنت نتمنى نقوله انا نحبك و نموت فيك و تعالى بوسني و احضني و موافقه و كل شي
بس الحمدلله صكر الخط
تاني يوم الساعه 12 في الليل جى اتصال من راجل اختي ان احمد خوي وقفوه بوابه و ماباش يوقف و صارت مشكله مع الدوريه الي غادي و رموا عليه رصاص و الافضل ما نقعدوش في حوشنا
انهارت امي من البكاء و خوفها على احمد خوي و شن صار فيه
فجأه رن الجرس و كنت خايفه انا و امي و لما شفنا شكون لقيناه حسام و امه جايين الساعه 1 في الليل خشت امه و حسام قعد في السياره طلب من امه ان نمشوا معاهم حوشهم و انه ما يقدرش يخلينا هنا بروحنا انا و امي
و بعد اقناع لبست انا و امي و ركبنا معاهم مشينا حوشهم و هو يقول لي امي شفته احمد و حاله كويس و ما نخليه بأذن الله
وصلنا حوشهم و خشينا و قعدنا حالتنا حاله و بعد ارهاق مشى حسام و قدر يخش لي احمد و يعطي لي امي تكلمه خشت امي ترتاح شويه و ام حسام رقدت و انا قعدت في الصاله نستنى لين حسام يروح و نفهم و نريح بالي
روح حسام الساعه 5 الصبح خش لقاني في الصاله لابسه توته و صقعانه و عيوني منفخات من الدموع و وجهي تعبان
قرب مني و كنت مطبسه راسي لوطه ما نبيشي يشوف دموعي مرر صبعه على خدي و قالي شن مسهرك في الصاله قتله بالي مشغول و مش عارفه شن الي صاير و خايفه
كنت نتكلم و نبكي و دموعي على خدي
قام لي راسي و ايده على ذقني و قالي ليش الخوف و انا هنا ؟ معاك
قتله خايفه على احمد و شن بيصير في حوشنا قالي كنت عنده و وصيت عليه ناس و الموضوع بكره ينحل
زاد قرب مني و عيني في عينه و قالي العيون هادوا ما يبكوش بكل الا من الفرح
ما نعرفش شن صارلي انهرت قدامه و ما قدرتش نسيطر على مشاعري شدني من خصري و كان واضح انه متحشم هلبا و يبي يهون عليا في الوقت نفسه
قربني من صدره و قام لي راسي و عيوني في عيونه قالي دمعتك زي الجمر على قلبي
قعدت عيني في عينه يقولوا لي بعض احلى كلام كنت نقول في قلبي نحبك نحبك نحبك
قالي خشي اغسلي وجهك نطلع للسياره شويه و نجيك قتله به تمام
مشيت غسلت وجهي و طلعت فتحت شعري و قعدت متكيه ع الصالون
جاني و ثنى ركبته بحيث وجهي في وجهه و انا متكيه ع الصالون قعد يقيم في شعراتي الي نازلات على خدي و اعطاني شكلاطه و ورده
ابتسمت قتله من وين الورده قالي من الجنان و قعد يضحك
قتله الشكلاطه بناكلها و الورده بنقطعها
قالي ليش تقطعيها ؟ قتله عندي حبيب و نبي نقطعها يحبني ما يحبنيش يحبني ما يحبنيش ...
حط صبعه على فمي قالي يحبني يحبني يحبني و كل ما يقول يحبني يزيد يقرب من فمي و صبعه ع فمي
يحبني يحبني يحبني
معاش نندري على روحي لقيت روحي مغمضه عيوني على كلمة يحبني يحبني و معاش حسيت بشي الا و فمه في فمي
حسيت بي لحيته و شنابه في فمي
دخت معاش نندري على شي
بعدها لعب بي خشمه على خشمي و يقولي عسللللللللل
معاش قدرت نفتح عيوني و لا نتحرك و لا شي
قامني و رفعني لي دار الي مفروض نرقد فيها و بمجرد ما حطني في الفراش باسني على راسي و انا كنت متحشمه نرفع راسي فيه و نفتح عيوني
همس في ودني تصبحي على خير يا احلى حاجة في الدنيا
يتبع الحلقة 3
